jo bhī ham se ban paḌā karte rahe

rut badalne kī duā karte rahe

kaisī kaisī chāhatoñ ke the charāġh

jin ko ham burd-e-havā karte rahe

Taañk kar ḳhush-rañg ummīdoñ ke phuul

ḳhushk Tahnī ko harā karte rahe

rañg ḳhushbū se alag hote na the

lafz ma.anī se judā karte rahe

jānte the chāplūsī kā hunar

kaam phir bhī dūsrā karte rahe

ḳhauf-nagrī ke makīñ the ham 'shafīq'

phir bhī jazboñ ko sadā karte rahe