khaḌkhaḌātā ek patta jab girā ik peḌ se

sote gahrī niiñd panchhī phaḌphaḌā kar uḌ chale

jal-bujhī yādoñ ne jab ā.ankhoñ meñ ik añgḌā.ī lī

adh-jale kāġhaz pe piile harf raushan ho ga.e

biin jab bajne lagī soyā madan bhī jaag uThā

zahr lahrāne lagā ḳhvāboñ meñ har ik saañp ke

lamha lamha TuuT kar bahne lagī muddat kī niiñd

rafta rafta ik haqīqat ḳhvāb jab banñe lage

log bāzīgar bane bāzār meñ aa.e magar

khel vo khelā ki ḳhud hī ik tamāshā ban ga.e

kuchh nahīñ haiñ ham 'matīn' ab yād-e-rafta ke sivā

aaj se pahle the be-shak aadmī ham kaam ke