mujh se hī mujh ko ab to milātā nahīñ koī
ik aa.ina bhī mujh ko dikhātā nahīñ koī
kyā jaane kyā hue vo sharāfat pasand log
ab ḳhairiyat bhī un kī batātā nahīñ koī
is ḳhauf meñ ki khud na bhaTak jaa.eñ raah meñ
bhaTke huoñ ko raah dikhātā nahīñ koī
sachchā.iyoñ ke rāste sunsān ho ga.e
bhūle se bhī yahāñ nazar aatā nahīñ koī
hassās haiñ jo aap to chehre paḌhā kareñ
zaḳhmoñ ko apne aap dikhātā nahīñ koī
nākāmiyoñ kī sej pe baiThā huuñ is liye
'tābāñ' yahāñ se mujh ko uThātā nahīñ koī