fitna uThā to razm-gah-e-ḳhāk se uThā
sūraj kisī ke pairhan-e-chāk se uThā
ye dil uThā rahā hai baḌe hausle ke saath
vo baar jo zamīñ se na aflāk se uThā
sab mojazoñ ke baab meñ ye mojaza bhī ho
jo log mar ga.e haiñ unheñ ḳhaak se uThā
sūraj kī zau charāġh-e-shikasta kī lau se ho
qulzum kī mauj dīda-e-namnāk se uThā
pūchhā jo us ne ahd-e-jarāhat kā mājrā
dariyā lahū kā har rag-e-poshāk se uThā