zamīñ kī ḳhaak to aflāk se ziyāda hai
ye baat par tire idrāk se ziyāda hai
ye āftāb use dhuup meñ jalā degā
jo chhāñv peḌ kī poshāk se ziyāda hai
ḳhayāl aatā hai akasr utaar pheñkūñ badan
ki ye libās mirī ḳhaak se ziyāda hai
chhalak uThā huuñ agar saarī kā.enāt se maiñ
to kyā ye ḳhaak tire chaak se ziyāda hai
libās dekh ke itnā hameñ ġharīb na jaan
hamārā ġham tirī imlāk se ziyāda hai