muñh se tire sau baar ke sharmā.e hue haiñ
kyā zarf hai ġhunchoñ kā jo itrā.e hue haiñ
kahte haiñ gino mujh pe jo dil aa.e hue haiñ
kuchh chhīne hue haiñ mire kuchh paa.e hue haiñ
ḳhanjar pe nazar hai kabhī dāman pe nazar hai
kaun aatā hai mahshar meñ vo ghabrā.e hue haiñ
lab par hai agar aah to āñkhoñ meñ haiñ aañsū
bādal ye bahut der se garmā.e hue haiñ
mai piine meñ kyā zid thī koī zahr nahīñ hai
hai terī qasam 'shola' qasam khaa.e hue haiñ