zabt-e-fuġhāñ se aa ga.ī hoñToñ pe jaañ talak

dekhoge mere sabr kī tāqat kahāñ talak

ġhaflat-shi.ārahā ke taġhāful kahāñ talak

jiitā rahegā kaun tire imtihāñ talak

vo merī aarzū thī jo ghuT ghuT ke rah ga.ī

vo dil kī baat thī jo na aa.ī zabāñ talak

gulshan meñ aa ke tum to ajab haal kar ga.e

bhūle hue haiñ murġh-e-chaman āshiyāñ talak

pāmāl karne ḳhaak uḌāne se fā.eda

aise chalo ki merā miTā do nishāñ talak

yaad aa.e chhuT ke daam se sayyād ke karam

pahuñchā do mujh ko koī mire mehrbāñ talak

'shola' ke ba.ad ḳhatm hai ījād-e-tarz-e-nau

kuchh lutf thā suḳhan kā usī ḳhush-bayāñ talak