ilāhī jaise ham us sham-e-anjuman se mile

isī tarah se har ik apne gul-badan se mile

mile na shaiḳh se dil aur na barahman se mile

mile to us ke ruḳh-o-zulf-e-pur-shikan se mile

mue pa qabr meñ kaun aur ḳhasta-tan se mile

kafan badan se mile aur badan kafan se mile

na tañg kar mujhe us ne kahāñ ye muñh paayā

ki gul kā ġhuncha tire ġhuncha-e-dahan se mile

bhulā de us ko abhī pal meñ chaukḌī saarī

nigāh-e-shoḳh agar āhū-e-ḳhutan se mile

ḳhudā ne qat.a kiyā hai tujhī pe ye jaama

phaban kisī kā tire kis tarah phaban se mile

vo chhoḌe kyūñki bhalā mashq dil jalāne kī

maza jise dil-e-āshufta kī jalan se mile

yahāñ to pech uThāyā kare dil-e-sad-chāk

sitam hai shāna vahāñ zulf-e-pur-shikan se mile

fazā-e-sīna meñ yuuñ hai hujūm aahoñ kā

daraḳht jaise ki aapas meñ hoeñ ghan se mile

huā ye hai hameñ irshād-e-mushfiqāna jo kal

ham ek bazm meñ haañ ek ahl-e-fan se mile

ki yaad rakh tū hai sheroñ meñ aib rabt-e-kalām

vo sher hoñ ki na hargiz suḳhan suḳhan se mile

aur ek is ke sivā yaad rakh ye hai ḳhūbī

vo tarz ho ki na tarz-e-nau-o-kuhan se mile

phir us ke ba.ad dam-e-sard bhar ke farmāyā

ye nukte ham ko sunā the baḌe jatan se mile

savere aage bayāñ ham ne kar diye yūñhī

bayān kījiyo jo shā.iqān-e-fan se mile

zahe nasīb tujhe is tarah milī daulat

vo jo mile bhī kisī ko to ek kaThan se mile

kaheñ suneñge ham aapas meñ dard-e-dil apnā

chaman meñ 'aish' jo ham bulbul-e-chaman se mile