āshiq ko tere laakh koī rahnumā mile
terā patā milā hai na terā patā mile
tum mujh se aa mile kabhī dushman se jā mile
jab ye mizāj hai to koī tum se kyā mile
ba.ad-e-fanā bhī ḳhair se tanhā nahīñ haiñ ham
bandoñ se chhuT ga.e to farishtoñ meñ aa mile
jab dair meñ ye dekhā ki apnā guzar nahīñ
ka.abe ke jaane vāloñ meñ majbūr jā mile
dekho 'rasā' chale to ho tum tauba toḌne
dar par na mai-kade ke koī pārsā mile