sham.eñ jugnū chāñd ke haale jam.a karo
bojhal hai shab narm ujāle jam.a karo
piinā hai zahrāb-e-halāhal mujh ko bhī
mere yaaro pyaar ke pyāle jam.a karo
shāyad ḳhud ko dohrā.e tārīḳh-e-vafā
apnī bazm meñ ham se jiyāle jam.a karo
aur baḌhā.eñ shaan chaman kī jin ke zaḳhm
aaj vo kāñToñ ke matvāle jam.a karo
sukh kī manzil ke sāthī to lākhoñ haiñ
dukh kī raah meñ chalne vaale jam.a karo
'raaj asīr-e-zulf na hoñge dīvāne
Dasne vaale naag nirāle jam.a karo