jahān-e-fikr pe chamkegā jab sitāra mirā

hunar zamāne pe tab hogā āshkārā mirā

abhī se mat mire kirdār ko marā huā jaan

tire fasāne meñ zikr aa.egā dobārā mirā

tujhe darāhim-o-dīnār kī shahī zebā

maiñ mutma.in huuñ ki lafzoñ pe hai ijārā mirā

ye ishtiyāq mirī dastaras vahāñ tak ho

ye intizār vo kis vaqt hogā saarā mirā

rumūz-e-ishq se kab hogī āshnā.ī tirī

mire nadīm tū samjhegā kab ishārā mirā

zamīn-e-qibla-e-avval tujhe ḳhudā rakhe

ki dil huā hai tire ġham meñ paarā paarā mirā