ki jis meñ mohabbat zarūrī nahīñ hai
mujhe vo ibādat zarūrī nahīñ hai
maiñ be-intihā chāhtā huuñ usī ko
kare vo mohabbat zarūrī nahīñ hai
mujhe tū hī tū yaad aatā rahe bas
ziyāda ināyat zarūrī nahīñ hai
use dekh kar hī merā kaam chaltā
mujhe ab ibādat zarūrī nahīñ hai
mohabbat se hī jaan letā hai aksar
kisī se adāvat zarūrī nahīñ hai
samajhnā ḳhudī ko paḌegā sabhī kuchh
vo de kuchh hidāyat zarūrī nahīñ hai
mujhe har qadam par hai us kī zarūrat
ho us ko zarūrat zarūrī nahīñ hai
diloñ pe kare 'raaj vo shaah aisā
kahīñ ho riyāsat zarūrī nahīñ hai