ghuum rahā thā ek shaḳhs raat ke ḳhārzār meñ

us kā lahū bhī mar gayā sub.h ke intizār meñ

ruuh kī ḳhushk pattiyāñ shāḳh se TūTtī rahīñ

aur ghaTā baras ga.ī jism ke regzār meñ

rañg meñ rañg ghul ga.e aks ke shīshe dhul ga.e

qaus-e-quzah pighal ga.ī bhīgī huī lagār meñ

ThanDī saḌak thī be-ḳhabar garm dinoñ ke qahr se

dhuup ko jhelte rahe peḌ khaḌe qatār meñ

bahtī havā kī mauj meñ tair rahe the sabz ghar

shahr ajiib sā lagā raat chaḌhe ḳhumār meñ

niind bhī jāgtī rahī puure hue na ḳhvāb bhī

sub.h huī zamīn par raat Dhalī mazār meñ

detā javāb kyā koī mere sivā na thā koī

Duub ke rah ga.ī sadā tañg siyāh ġhaar meñ