gardish-e-vaqt se laḌnā hai jhagaḌnā hai abhī

chaḌhte sūraj haiñ hameñ aur ubharnā hai abhī

hausle dūrī-e-manzil se na thak jaa.eñ kahīñ

kitnī pur-ḳhār sī rāhoñ se guzarnā hai abhī

nok-e-mizhgāñ pe utar aa.e haiñ aañsū aise

abr-e-bārāñ kī tarah jaise barasnā hai abhī

us ko ḳhvāboñ meñ basā rakkhā hai ḳhushbū kī tarah

aur ta.abīr talak us ko Thaharnā hai abhī

Thokareñ ham ko sambhalne kā sabaq detī hai

bārhā tum ko 'sadaf' girnā sambhalnā hai abhī