ye maanā zindagī meñ ġham bahut haiñ
hañse bhī zindagī meñ ham bahut haiñ
tirī zulfoñ ko kyā suljhā.ūñ ai dost
mirī rāhoñ meñ pech-o-ḳham bahut haiñ
nahīñ hai munhasir kuchh fasl-e-gul par
junūñ ke aur bhī mausam bahut haiñ
ġhubār-ālūda chehroñ par na jaanā
inhīñ meñ kīqabād-o-jam bahut haiñ
mujhe kuchh saaz hai nashtar se varna
mire zaḳhmoñ ke yaañ marham bahut haiñ
qafas ye jaan kar toḌā thā maiñ ne
qafas ko toḌ kar bhī ġham bahut haiñ
karūñ kyā chāra in āñkhoñ kā 'maikash'
ki un ke sāmne pur-nam bahut haiñ