dil-e-muztar meñ jaltī ek hasrat aur rakhnī hai

mujhe tāq-e-junūñ meñ ik mohabbat aur rakhnī hai

garebāñ chaak hai garche mujhe kuchh aur karnā hai

ki ab in vahshatoñ meñ ek vahshat aur rakhnī hai

ḳhatīb-e-vaqt ne sikhlā diyā ye ahl-e-duniyā ko

ḳhitābat aur rakhnī hai adāvat aur rakhnī hai

koī bhī vārdāt-e-qalb-o-jāñ zāhir nahīñ karnī

mujhe ab intiqāman apnī hālat aur rakhnī hai

tavāf-e-shahr-e-jānāñ se agar 'sajjād' fursat ho

thake pairoñ ke nīche ik masāfat aur rakhnī hai