nahīñ bilkul nahīñ vallāh nahīñ hai
mire mahbūb se achchhā nahīñ hai
na-jāne kyuuñ mujhe lagtā hai aise
mirā chehra mirā apnā nahīñ hai
ye merā aks hai lekin adhūrā
jo honā chāhiye vaisā nahīñ hai
tirā itrānā bantā hai bajā hai
tire dil meñ koī utrā nahīñ hai
tujhe bhī bhuul jaatā ghar kā rasta
to mere paas jo baiThā nahīñ hai
batānā kyā ḳhatā sarzad huī thī
tū itne roz kyuuñ bolā nahīñ hai
hamārā zabt gar kāmil nahīñ to
tumhārā husn kyā fitna nahīñ hai
agar tū hai na.e lafzoñ kā shā.ir
purānā merā bhī lahja nahīñ hai