sūfī-e-shahr mire haq meñ duā kyā kartā

ḳhud thā muhtāj-e-atā mujh ko atā kyā kartā

apnī āvāz ke sannāTe se hol aatā hai

maiñ bayābān-e-tamannā meñ sadā kyā kartā

saañs lete hue siine meñ jalan hotī hai

maiñ tire shahr kī shādāb fazā kyā kartā

is fazā meñ to farishtoñ ke bhī par jalte haiñ

maiñ yahāñ jur.at-e-parvāz bhalā kyā kartā

mohtasib jurm mirā dekh ke ḳhāmosh rahā

ḳhud ḳhatā-kār thā ahkām-e-sazā kyā kartā

tum ne to chhīn lī mujh se mirī goyā.ī bhī

maiñ to ik kāġhaz-e-ātish-zada thā kyā kartā