jā.ūñ kahāñ shu.ūr-e-hunar kis ke paas hai
āñkheñ haiñ sab ke paas nazar kis ke paas hai
hadd-e-nazar meñ manzil-e-maqsūd hai magar
jā.egā kaun raḳht-e-safar kis ke paas hai
zaḳhmoñ meñ ho rahe haiñ izāfe na.e na.e
lekin nahīñ ḳhabar ki tabar kis ke paas hai
ham haiñ ba-qaul un ke agar tīrgī-pasand
phir dosto kalīd-e-sahar kis ke paas hai
maiñ qāmat-e-shajar kā pujārī nahīñ 'asad'
mujh ko ye dekhnā hai samar kis ke paas hai