sail-e-balā-e-ġham na pūchh kitne gharauñde Dah ga.e
naav to ḳhair naav thī saath kināre bah ga.e
dil meñ hujūm-e-shauq thā lab pe na baat aa sakī
abr falak pe khul ga.e biij zamīñ pe rah ga.e
kis meñ thī tāb-e-zaḳhm-e-shauq kis meñ thā ġham kā hausla
ham hī ye dukh uThā ga.e ham hī ye dard sah ga.e
ham-safarān-e-shauq ne raah meñ haar maan lī
dasht-e-shab-e-firāq meñ ham hī akele rah ga.e
'mohsin'-e-be-navā ko bhī dād-e-kamāl dījiye
vo bhī hadīs-e-dard-e-jāñ apnī ġhazal meñ kah ga.e