fazā-e-shām ziyā-e-sahar usī se milī
kashish hayāt ko al-muḳhtasar usī se milī
usī se mujh ko milā ishtiyāq manzil kā
mire safar ko fazā-e-safar usī se milī
buland martaba-e-musht-e-ḳhāk usī ne kiyā
tamām fahm-o-zakā-o-nazar usī se milī
ġhurūr ḳhud pe jise jis qadar bhī ho lekin
milī jise bhī mata-e-hunar usī se milī
usī ne zulmat-e-gum-gashtagī ko duur kiyā
talāsh-e-haq ko rah-e-mo'tabar usī se milī
atā karegā hameñ bhī vahī ridā-e-ziyā
ki jugnuoñ ko qabā-e-sharar usī se milī
vo be-ḳhabar hai nahīñ ehtirām jis ko ḳhabar
ki aadmī ko milī har ḳhabar usī se milī