haañ abhī kuchh der pahle sher kī gūñjī thī dhaaḌ
ab to sannāTā hai shāyad ho chukī ho chīr-phāḌ
jism se pahra haTā ye khurdurī khāleñ udheḌ
ḳhuun kī jhāḌū se phir in haDDiyoñ kī gard jhaaḌ
zehan meñ jab koī shīrīñ kā tasavvur aa gayā
sar pe teshoñ ko uThā.e dauḌte aa.e pahāḌ
vahshateñ tārīkiyāñ rusvā.iyāñ barbādiyāñ
haa.e ummīdoñ kī bastī aur phir itnī ujaaḌ
justujū kī dhuup meñ jo chalte chalte mar ga.e
un kī lāshoñ ko uThā kar niim ke saa.e meñ gaaḌ
raat bhar ThanDe thapeḌe dastakeñ dete rahe
sub.h tak jaage na the so.e hue tere kivāḌ