sub.h hotī hai to daftar meñ badal jaatā hai
ye makāñ raat ko phir ghar meñ badal jaatā hai
ab to har shahr hai ik shahr-e-tilismī ki jahāñ
jo bhī jaatā hai vo patthar meñ badal jaatā hai
ek lamha bhī Thahartā nahīñ lamha koī
pesh-e-manzar pas-e-manzar meñ badal jaatā hai
naqsh ubhartā hai ummīdoñ kā falak par koī
aur phir dhund kī chādar meñ badal jaatā hai
band ho jaatā hai kuuze meñ kabhī dariyā bhī
aur kabhī qatra samundar meñ badal jaatā hai
apne mafhūm pe paḌtī nazar jab us kī
lafz achānak but-e-shashdar meñ badal jaatā hai