sunte haiñ ki mil jaatī hai har chiiz duā se

ik roz tumheñ maañg ke dekheñge ḳhudā se

jab kuchh na milā haath duāoñ ko uThā kar

phir haath uThāne hī paḌe ham ko duā se

duniyā bhī milī hai ġham-e-duniyā bhī milā hai

vo kyuuñ nahīñ miltā jise māñgā thā ḳhudā se

tum sāmne baiThe ho to hai kaif kī bārish

vo din bhī the jab aag barastī thī ghaTā se

ai dil tū unheñ dekh ke kuchh aise taḌapnā

aa jaa.e hañsī un ko jo baiThe haiñ ḳhafā se

ā.īñe meñ vo apnī adā dekh rahe haiñ

mar jaa.e ki jī jaa.e koī un kī balā se