kahne ko to hai kyā nahīñ

kyuuñ hai ḳhalish patā nahīñ

mujh se hue vo kyuuñ ḳhafā

un se mujhe gilā nahīñ

jis kī thī ham ko justujū

kyuuñ vo hameñ milā nahīñ

phir bhī sazā mujhe milī

jab ki merī ḳhatā nahīñ

uljhā huuñ itnā ishq meñ

mujh ko mirā patā nahīñ

yuuñ to bahut haiñ rāhateñ

ġham kī mire davā nahīñ

kahne ko to haiñ duur vo

dil se magar judā nahīñ

gardish meñ huuñ ghirā huā

aadmī maiñ burā nahīñ