in shoḳh hasīnoñ kī adā aur hī kuchh hai
aur in kī adāoñ meñ mazā aur hī kuchh hai
ye dil hai magar dil meñ basā aur hī kuchh hai
dil ā.īna hai jalva-numā aur hī kuchh hai
ham aap kī mahfil meñ na aane ko na aate
kuchh aur hī samjhe the huā aur hī kuchh hai
be-ḳhud bhī haiñ hoshiyār bhī haiñ dekhne vaale
in mast nigāhoñ kī adā aur hī kuchh hai
'āzād' huuñ aur gesu-e-pechāñ meñ giraftār
kah do mujhe kyā tum ne sunā aur hī kuchh hai