kabhī jhūTe sahāre ġham meñ raas aayā nahīñ karte

ye bādal uḌ ke aate haiñ magar saayā nahīñ karte

yahī kāñTe to kuchh ḳhuddār haiñ sehn-e-gulistāñ meñ

ki shabnam ke liye dāman to phailāyā nahīñ karte

vo le leñ gosha-e-dāman meñ apne yā falak chun le

mirī ā.ankhoñ meñ aañsū baar baar aayā nahīñ karte

salīqa jin ko hotā hai ġham-e-daurāñ meñ jiine kā

vo yuuñ shīshe ko har patthar se Takrāyā nahīñ karte

jo qīmat jānte haiñ gard-e-rāh-e-zindagānī kī

vo Thukrā.ī huī duniyā ko Thukrāyā nahīñ karte

qadam mai-ḳhāna meñ rakhnā bhī kār-e-puḳhta-kārāñ hai

jo paimāna uThāte haiñ vo tharrāyā nahīñ karte

'nushūr' ahl-e-zamāna baat pūchho to larazte haiñ

vo shā.er haiñ jo haq kahne se katrāyā nahīñ karte