hasrat-e-faisla-e-dard-e-jigar baaqī hai

aur abhī silsila-e-shām-o-sahar baaqī hai

aa.iye aur nazar se bhī zamāna dekheñ

zindagī hai to mohabbat kī nazar baaqī hai

yā mirī sub.h meñ raunaq nahīñ hañgāmoñ kī

yā mirī shaam ba-unvān-e-sahar baaqī hai

naujavānī ga.ī anfās kī ḳhushbū na ga.ī

phuul murjhā.e magar bād-e-sahar baaqī hai

kuuch hī kuuch hai har rañg meñ duniyā kī hayāt

ik safar ḳhatm huā ek safar baaqī hai

yād-gār-e-harm-o-dair hai TuuTā huā dil

shahr vīrān huā ek ye ghar baaqī hai

husn dilkash hai jahāñ tak hai tabassum kā sabāt

ishq zinda hai agar dīda-e-tar baaqī hai

be-mai-o-rañg hai kāshāna-e-tahzīb-e-jadīd

kuchh pas-e-parda nahīñ parda-e-dar baaqī hai

zindagī kyā hai abhī tajraba karnā hai 'nushūr'

shā.irī kyā hai abhī naqd o nazar baaqī hai