rāh-e-vafā meñ luuTā gayā dil

hai hai mirā dil bekas mirā dil

roz-e-azal yuuñ paidā huā dil

lī ġham ne karvaT aur ban gayā dil

har dushman-e-jāñ ahl-e-vafā hai

ik bā-vafā tum ik bā-vafā dil

dil jī rahā hai ġham ke sahāre

jab miT gayā ġham samjho miTā dil

tum dil meñ ho yā tasvīr-e-hairat

tasvīr-e-hairat yā hai mirā dil

sunsān mahfil vīrān pahlū

ruḳhsat hue tum ruḳhsat huā dil

TuuTā na āḳhir sadme se 'mānī'

shīshe se bhī thā nāzuk mirā dil