nafas nafas pe mujhe yaad aa.e jaate haiñ
tamām rūh-e-taḳhayyul pe chhā.e jaate haiñ
ham un kā zauq-e-mohabbat chhupā.e jaate haiñ
magar ye abr jo sāvan ke aa.e jaate haiñ
yahī samāñ thā kisī kī vidā-e-āḳhir kā
sitāra-hā-e-sahar jhilmilā.e jaate haiñ
zamāna yaad kare yā sabā kare ḳhāmosh
ham ik charāġh-e-mohabbat jalā.e jaate haiñ
'nushūr' aap ke ash.ār-e-dard kyā kahnā
kisī kī bazm-e-mohabbat meñ gaa.e jaate haiñ