lā.iq-e-dīd vo nazārā thā

laakh neze the sar hamārā thā

ek āñdhī sī kyuuñ badan meñ hai

us ne shāyad hameñ pukārā thā

shukriya reshmī dilāse kā

tiir to aap ne bhī maarā thā

bādbāñ se ulajh gayā lañgar

aur do haath par kinārā thā

sāhibo baat dastaras kī thī

ek jugnū thā ik sitārā thā

āsmāñ bojh hī kuchh aisā hai

sar jhukānā kise gavārā thā

ab namak tak nahīñ hai zaḳhmoñ par

dostoñ se baḌā sahārā thā