kyā vasl kī saa.at ko tarasne ke liye thā
dil shahr-e-tamannā tire basne ke liye thā
sahrā meñ bagūloñ kī tarah naach rahā huuñ
fitrat se maiñ bādal thā barasne ke liye thā
rotī huī ek bhiiḌ mire gird khaḌī thī
shāyad ye tamāsha mire hañsne ke liye thā
kuchh raat kā ehsāñ hai na sūraj kā karam hai
ġhuncha to bahar-hāl bikasne ke liye thā
is raah se guzrā huuñ jahāñ saañs na de saath
har naqsh-e-kaf-e-pā mire Dasne ke liye thā
har qatra mirī aañkh se bahne ko thā betāb
har zarra mire paañv jhulasne ke liye thā