maiñ ne kabhī nazar na kī dil-kashī-e-hayāt par
merī tamām zindagī un kī jamāliyāt par
mujh ko hayāt ke sivā chāhiye ik ġham-e-hayāt
tab-e-ġham-āfrīñ mirī rah na sakī hayāt par
vo bhī ġhayūr o sharmgīñ dil bhī nazākat-āfrīñ
choT lagī hai baat se baat baḌhī hai baat par
chāñd hai aur chāñdnī husn hai aur husn-e-yār
mere hazār din nisār husn kī ek raat par
husn yahāñ nazar-fareb dard yahāñ jigar-gudāz
haa.e ki miT gayā 'nushūr' jalva-e-be-sabāt par