vaqt ik dariyā hai dariyā sab bahā le jā.egā
ham magar tinke haiñ ham tinkoñ se kyā le jā.egā
ik ajab āshob hai kyuuñ bastiyoñ meñ jalvagar
kyā ye har insān se ḳhauf-e-ḳhudā le jā.egā
hai to ḳhurshīd-e-haqīqat par baḌā be-mehr hai
dil se jazbe aañkh se aañsū churā le jā.egā
boriye par baiThne kā lutf hī kuchh aur hai
shahryār-e-asr is takiye se kyā le jā.egā
har guzargāh-e-tamannā par bahut sī gard hai
lekin is ko ek hī jhoñkā uḌā le jā.egā
āfiyat ke dā.eroñ meñ yaar saare band haiñ
koī mausam koī tūfāñ us se kyā le jā.egā