siyāh raat se ham raushnī banāte haiñ

purānī baat ko aksar na.ī banāte haiñ

kal ek bachche ne ham se kahā banāo ghar

so ham ne kah diyā Thahro abhī banāte haiñ

ham ek aur hī manzar kī taak meñ haiñ miyāñ

ye dhūp-chhāñv ke naqshe sabhī banāte haiñ

musavvirān-e-fanā apne canvas pe kabhī

na koī shahr na koī galī banāte haiñ

ham us dayār meñ zinda haiñ jis ke saare log

kabhī fatīla kabhī lablabī banāte haiñ