shab-e-siyāh se jo istifāda karte haiñ
vahī charāġhoñ kā mātam ziyāda karte haiñ
diloñ kā dard kahāñ jaam meñ utartā hai
harīf-e-vaqt ko ham ġharq-e-bāda karte haiñ
purānī talḳhiyāñ dāman bahut pakaḌtī haiñ
kabhī nayā jo koī ham irāda karte haiñ
paḌī thī dil kī zamīñ jaane kab se be-masraf
ab us meñ yādoñ ke but īstāda karte haiñ
ajiib daur hai ye jis meñ saare dānish-var
diloñ ko tañg makāñ ko kushāda karte haiñ
ye āsmān-e-vatan kyuuñ ridā hamārī hai
ham is zamīn ko kaise labāda karte haiñ