sab ke pairoñ meñ vahī rizq kā chakkar kyuuñ hai
girya is ahd ke logoñ kā muqaddar kyuuñ hai
ye jo manzar haiñ baḌe kyuuñ haiñ mirī āñkhoñ se
ye jo duniyā hai mire dil ke barābar kyuuñ hai
āsmānoñ pe bahut der se Thahrī hai shafaq
sochtā huuñ ki abhī tak yahī manzar kyuuñ hai
maiñ ba-zāhir to ujāloñ meñ basar kartā huuñ
ik par asrār syāhī mire andar kyuuñ hai
kashtiyāñ Duub chukīñ sar-phire ġharqāb hue
mushta.il ab bhī isī tarah samundar kyuuñ hai