gaañv kī aañkh se bastī kī nazar se dekhā
ek hī rañg hai duniyā ko jidhar se dekhā
ham se ai husn adā kab tirā haq ho paayā
aañkh bhar tujh ko buzurgoñ ke na Dar se dekhā
apnī bāñhoñ kī tarah mujh ko lagīñ sab shāḳheñ
chāñd uljhā huā jis raat shajar se dekhā
ham kisī jañg meñ shāmil na hue bas ham ne
har tamāshe ko faqat rāhguzar se dekhā
har chamakte hue manzar se rahe ham nārāz
saare chehroñ ko sadā dīda-e-tar se dekhā
phuul se bachchoñ ke shānoñ pe the bhārī baste
ham ne schōl ko dushman kī nazar se dekhā