udaas raat kā dukh jāntā koī bhī na thā
mirī tarah use pahchāntā koī bhī na thā
sab apne qad ko sanobar samajh rahe the vahāñ
mire vajūd ko gardāntā koī bhī na thā
vo jis kī laash saḌak par paḌī huī thī kal
us ek shaḳhs ko pahchāntā koī bhī na thā
sab apnī dhun meñ magan apnī fikr meñ gum the
nasīhatoñ ko mirī māntā koī bhī na thā
maiñ ajnabī thā vahāñ sab ke vāste 'as.ad'
tire nagar meñ mujhe jāntā koī bhī na thā