tajalliyoñ se ġham-e-e'tibār le ke uThā
sukūñ nahīñ thā to dil kā qarār le ke uThā
guzarne vaale musāfir se kī umīd-e-vafā
har ek rah se koī intizār le ke uThā
kiye junūñ meñ yahāñ tak sujūd-e-majbūrī
ki āstāñ se tire iḳhtiyār le ke uThā
chaman meñ ġham kī bahāreñ guzār diiñ maiñ ne
vahāñ se apne nasheman ke ḳhaar le ke uThā
ḳhizāñ-nasīb hai duniyā use ḳhabar kyā hai
bahār le ke jo baiThā bahār le ke uThā
chaman se kyuuñ na ta.alluq ho sūrat-e-shabnam
vo gir paḌā jo alā.eq kā baar le ke uThā
hayāt-ḳhez hai har rañg meñ sabāt 'nushūr'
jo sañg ho ke bhī baiThā sharār le ke uThā