vo jinheñ dasht-e-anā se paar honā thā hue
ham ko lekin sāhab-e-kirdār honā thā hue
kab talak jiite visāloñ kī tamannāoñ meñ log
zindagī se ek din bezār honā thā hue
aur the vo jin ko jāgīreñ atā us se huiiñ
apnī qismat meñ to bas fankār honā thā hue
kuchh parindoñ ko milī ūñchī uḌānoñ kī sazā
kuchh ko lekin qaid meñ par-dār honā thā hue
ham ko banñā thā kaḌī zanjīr kī ham ban ga.e
vo jinheñ pāzeb kī jhankār honā thā hue
koshish-e-paiham se bhī koī na ban paa.ī lakīr
khīñchnā the dā.ere parkār honā thā hue
vaar apne aap par karnā thā 'as.ad' tah-ba-tah
ham ko ik TuuTī huī talvār honā thā hue