mujhe bhī vahshat-e-sahrā pukār maiñ bhī huuñ
tire visāl kā ummīd-vār maiñ bhī huuñ
parind kyuuñ mirī shāḳhoñ se ḳhauf khāte haiñ
ki ik daraḳht huuñ aur sāya-dār maiñ bhī huuñ
mujhe bhī hukm mile jaan se guzarne kā
maiñ intizār meñ huuñ shahsavār maiñ bhī huuñ
bahut se neze yahāñ ḳhud mirī talāsh meñ haiñ
ye dasht jis meñ barā-e-shikār maiñ bhī huuñ
havā chale to laraztī hai merī lau kitnī
maiñ ik charāġh huuñ aur be-qarār maiñ bhī huuñ