vo aadmī jo tirī aarzū meñ martā hai
vo tujh se pyaar nahīñ ḳhud se ishq kartā hai
fazā meñ ḳhauf ke parcham buland hote haiñ
savād-e-shām se lashkar koī guzartā hai
mirī zamīñ ke bulāve ġhazab ke haiñ lekin
koī junūñ mire par rāt-din katartā hai
maiñ apne aap ko ab kis ke chaak par rakkhūñ
shikasta zarf dobāra kahīñ sañvartā hai
lage hue haiñ jahāñ par visāl ke ḳheme
udhar se hijr kā rahvār bhī guzartā hai