ḳhud ke ehsās-e-mohabbat ne mujhe zinda rakhā
mere kuchh nek ḳhayālāt ne tābinda rakhā
mujh ko mushkil hī guzartī hai shanāsā.ī se
kyūñki ai dosto tum ne mujhe sharminda rakhā
sahl-dil huuñ to mujhe aap hī chalnā hai mahz
apne me.ayār ko so ḳhud se hī pā.inda rakhā
dil-lagī kartī rahī ḳhāk-e-mohabbat mujh se
zindagī maiñ ne tujhe ret kā bāshinda rakhā
kitne rañgoñ se mirī saañs ke kas-bal tole
phir bhī jī bhaTke nahīñ dhyān ye ā.inda rakhā