ġham nahīñ jo luT ga.e ham aa ke manzil ke qarīb
jaane kitnī kashtiyāñ Duubī haiñ sāhil ke qarīb
sarfaroshī merī koī rañg dikhlā jā.egī
aa gayā huuñ ye irāda le ke qātil ke qarīb
sirf dil kī be-hisī thī fāsla kuchh bhī na thā
jab kiyā ehsās paayā aap ko dil ke qarīb
tum ne jo rakkhā yuuñ hī taḳhrīb-kārāna mizāj
kaun aane degā tum ko apnī mahfil ke qarīb
rukte haiñ kab rokne se mauj-e-tūfāñ ke 'guhar'
hausle vaale pahuñch jaate haiñ sāhil ke qarīb