toḌ kar shīsha-e-dil ko mire barbād na kar
is tarah mujh pe sitam ai sitam-ījād na kar
ye nigah lutf kī hai is se na kar qatl mujhe
chashm-e-jāñ-baḳhsh ko yuuñ ḳhanjar-e-jallād na kar
rū-e-raushan kī kabhī diid mujhe bhī diide
rah ke poshīda mujhe muztar-o-nāshād na kar
tere hī dil kā agar gosha qafas hai sayyād
phir to hargiz mujhe is qaid se āzād na kar
jab yahāñ suntā nahīñ terī fuġhāñ koī 'guhar'
maslahat jaan ḳhamoshī hī meñ fariyād na kar