ishq apnā ajab tamāsha hai
ik jahāñ hai ki ham ko taktā hai
jaise be-māñ ke tifl ho ye dil
aaj kuchh is tarah se sahmā hai
tujh ko pā kar bhī shaad kab thā dil
tujh ko kho kar bhī haath maltā hai
aao us des meñ chaleñ jis jā
ishq taptā hai ruup jaltā hai
ek hī ruup ke hayūle haiñ
gaah 'saifū' hai gaah 'mīrā' hai
kitnā nāzuk hai ābgīna-e-dil
ġhuncha chaTke to aur dukhtā hai
be-ḳhatar hai 'azīm' har ġham se
us pe āl-e-nabī kā saayā hai