ishq meñ kuchh is tarah dīvāngī chhā.ī ki bas
kūcha-e-arbāb-e-dil se ye sadā aa.ī ki bas
jab qadam dīvāngī kī had se aage baḌh ga.e
dekhne vāloñ ko mujh par vo hañsī aa.ī ki bas
bū-e-mushkīñ muskurā.ī phuul ḳhushbū le uḌe
us sarāpā-nāz kī yuuñ zulf lahrā.ī ki bas
dekh kar vo bāñkpan vo husn vo rañgīñ shabāb
dil kī hasrat ne bhī āḳhir lī vo añgḌā.ī ki bas
ham se kuchh bhī ho na paa.ī ehtiyāt-e-dilbarī
apnī kotāhī pe aisī aañkh sharmā.ī ki bas
le ke sāġhar haath meñ ham chal paḌe jab ai 'mubīn'
mai-kade meñ ik fazā kuchh aisī lahrā.ī ki bas