yūñhī vābastagī nahīñ hotī
duur se dostī nahīñ hotī
jab diloñ meñ ġhubār hotā hai
Dhañg se baat bhī nahīñ hotī
chāñd kā husn bhī zamīn se hai
chāñd par chāndnī nahīñ hotī
jo na guzre parī-vashoñ meñ kabhī
kaam kī zindagī nahīñ hotī
din ke bhūle ko raat Dastī hai
shaam ko vāpsī nahīñ hotī
aadmī kyuuñ hai vahshatoñ kā shikār
kyuuñ junūñ meñ kamī nahīñ hotī
ik maraz ke hazār haiñ nabbāz
phir bhī tashḳhīs hī nahīñ hotī