kuchh to ta.alluq kuchh to lagāo
mere dushman hī kahlāo
dil sā khilaunā haath aayā hai
khelo toḌo jī bahlāo
kal aġhyār meñ baiThe the tum
haañ haañ koī baat banāo
kaun hai ham sā chāhne vaalā
itnā bhī ab dil na dukhāo
husn thā jab mastūr hayā meñ
ishq thā ḳhūn-e-dil kā rachāo
husn banā jab bahtī gañgā
ishq huā kāġhaz kī naav
shab bhar kitnī rāteñ guzrīñ
hazrat-e-dil ab hosh meñ aao